Dost Bankar Bhi - Ahmed Faraz Options

[noorie]

Dost bankar bhi nahin saath nibhanewala
- Ahmed Faraz

Dost bankar bhi nahin saath nibhanewala
wohi andaaz hai zaalim ka zamanewala

Ab ise log samajhate hain giraftaar mera
sakht nadim hai mujhe daam main laanewala

Kya kahen kitne maraasim the hamare us se
woh jo ek shakhs hai moonh pher ke jaanewala

Tere hote hue aa jaati thi saari duniya
aaj tanha hoon toh koi nahi aanewala

Muntazir kis ka hoon tooti huye dahaleez pe main
kaun aayega yahan kaun hai aanewala

Main ne dekha hai bahaaron mein chaman ko jalte
hai koi khwaab ki tabeer bataanewala

Kya khabar thi jo meri jaan main ghula hai itna
hai wohi mujh ko sar-e-daar bhi laanewala

Tum taqalluf ko bhi ikhalaas samajhte ho 'Faraz'
dost hota nahin har haath milaanewala