Here is the transcript of Jaimala gold presented by Pancham
Jaimala Gold By Pancham
Recorded in 1971
Aired on 29.08.04
Fauzi bhaiyon ko namaskar,
Aaj mujhe aapke saamne wo raaj kholana padh rahaa hai, jise main chhupaataa
hoon...
Ye un dino ki baat hai, jab main kalkatte me padhaa karta tha... sangeet se
paidaaishi lagaav bhi tha aur dhune bhi banayaa
karta thaa..ek din main koi dhun gun gunaa raha tha, pitaji ne sunaa, aur
poochha ye kiski dhun hai.. maine darate darate
kahaa.. meri... wo din to gaya doosare din apane makaan ke chhat par maine
dekha ki pitaji, mata ji aur naani ji ke beech
jhagadaa ho raha hai. pitaaji kahate hain, mujhe pancham ko bombay le jaane
do main use kuchh banana chahta hoon..
mata ji aur naani ji kahti, ki ladka bombay gaya to bigadaa, ise filmy
duniya ki hawaa na lage to achchha hai... badi der baad
pitaji ne mujhe ek mahine ke liye bombay le jaane ki permission le hi li...
to bhaaiyo main isi tarah bambai laaya gaya, aur pitaaji ki dekh-rekh me
kaam shuru kiya.. meri pahli film chhote nawab thi,
aur mere pahle geet ko sun kar lata ji ne mujhe bahut aashirwaad diye.. aaj
isi geet se main apna program shuru karta hoon
Ghar aaja ghir aaye badra saanwariya [Chhote Nawaab]
kabhi kabhi aisa hota hai ki hum ek dhun jis film ke liye banate hain wo
usme nahin kisi aur film me kaam aa jaati hai.. usi
tarah jaise daane daane par likha hai khane wale ka naam..ye geet maine kisi
aur film ke liye banaya tha lekin aapke chahite
kalakar aur mere jigari dost Mehmood ko itna pasand aaya ki mere paas se
udaa le gaye, aur apni film Pati-Patni me fit kar
diya...
Kajre badarwaa re.. [Pati-Patni]
Jeevan me jab bhi sukh chain ke do pal mile, apne pyar karne walo ko zaroor
yaad karna chahiye.. shaayd isiliye aaj mujhe
swargiya roshan ji yaad aa rahe hain.... Roshan ji hamesha kaha karte the
Pancham agar tumne apne aap ko sambhala to ye
kala din tumko zaroor oonchaa uthayegi... aaj main roshan ji ki aatma se
kehta hoon, aapki yaadon ke sahaare apne jeevan
ko sajaane ki koshish kar raha hoon, aur saathiyon apni mehanat ka phal jo
kuchh bhi mujhe milta hai, usi par raaji hoon,
bilkul roshan ji ke is geet ki tarah...
Bahut diya dene wale ne tujhako [Soorat aur Seerat]
Ek baar main aur mera dost baadal kalkatta ke autam ghaat par baithe, ganga
ki leharon se khel rahe the.. chanchal
dhaaraa, pawan ki mastani chaal dilon me halchal macha rahi thi.. baadal ne
kaha ganga maiyya par ek gaana banaao.. main
ek dhun gunguna hi raha tha. doosare din ham bambai chale aaye, dekha phir
wohi mehmood saahab maujood hain.. kahne
lage ganga maiyya ke oopar ek gaana bahut urgent chaahiye.. maine usi dhun
par Aanand Bakshi se geet likhwaya aur
mehmood ke hawaale kardiya.. film hai Chandan Ka Palna
O ganga maiyya
kai saal pahle jab main daarjiling me tha, raat ke sannate me, chaay ke khet
se baansuri ki ek surili suhani aawaaz ubhari aur
mere kaano se takraane lagi.. main suron ki lehron me behta gayaa, behta
gayaa aur behta gayaa.. bambai aane par naasir
saab ki fil Teesri manjil me usi dhun ki ek halki si jhalak maine pesh ki..
awaaz hai aasha ji ki.. naam hai sona re sona
O mere sona re sona re..
saathiyon suron ki bhaasha ham sab samajhte hain.. yehi kaaran hai ki jab
bhi koi achchhi dhun sunte hain usi me kho jaate
hain.. aaiye ab mere saath salilda ki bangla rachana suniye... agar aap me
se koi bhai shabdon ka arth nahin samajh
paayenge to bhi suron ke bahaav me avashya beh jaayenge.
naa jivo na rajani
doston baharon ke sapne ke samooh geet ki recoding ke samay naasir saab ne
mujhe kaha ki pancham mujhe is gaane me
kuchh mehsoos ho rahi hai aur mujhe ek nayee baat soojhi aur maine kaha ki
agar lata ji se -ha-aa-aa' kehalwa di jaaye to .
ye sun ke naasir saab uchhal pade...
Chunari sambhaal gori udi chali jaaye
san 56 me pitaaji ki recording me maine do ladko ko mendolin aur violin
bajaate hue dekha.. bilkul hi mere hi kad ka, meri hi
tarah.. bas antar tha to kapado ka.. main bengali style ke dhoti kurte me
tha aur wo pent shirt me... main kuchh unki taraf
khinchta sa gaya aur uske baad ham log dosti me bandh gaye.. ye the lakshmi
aur pyare
leejiye ab lakshmi aur pyare ka ye geet suniye
Neend kabhi rehti thi aankhon me...
Kuchh sangeetkaar aise hain jinke gaane main bachpan se sun raha hoon.. us
wakt bhi unke geet mash-hoor the aur jab
main jawaan hua to bhi unke sangeet me wohi jaan rahi.. doston un mahaan
sangeetkaaro me Naushaad saab bhi hain..
Naushaad saab ka purana geet suniye.. jo aaj bhi dil ke taaron ko chhedta
rehta hai
Tu ganga ki mauj main jamna ka dhara..
Us sangeetkaar ki rachana suniye, jinki har geet me shastriya sangeet ka
aadhaar rehta hai.. Aap hain mere param mitra shri
jaidev.. prastut geet film hum dono ka hai
Jahan me aisa kaun hai ki jisko gham mila nahin
Mere ek mitra filmi duniya ke har imtihaan paas kar chuke hain.. aajkal wo
bade mash-hoor hero, sangeetkaar, director,
producer, lekhak aur gaayak hain.. lekin bechare kabhi kabhi maayoos ho
jaate hain.. us din kahne lage filmo ki haalat bahut
kharaab hoti jaa rahi hai.. maine socha hai ki khandwa chale jaayein aur
kheti karein... gehun khaayein bhi aur bechein bhi..
maine kaha bhai agar aap film industry me hi hal chalaate rahein to isko hi
upjaau bana sakte hain
jawaab sun kar bade raub se hanse... ye khud chahe jaise rahe, doosro ko
hansta hua dekhna chahte hain... ye ho to inki
mahanata hai.. jab bhi aate hain film Padosan ke do geet sune bina nahin
jaate hain.. inhein pechaniye.. pancham sing "are
he lalalalal la"
Mere saamne wali khidaki me
Doston agar mujh se mere pujya pitaaji ke baare me poochha jaaye to main ek
kalakaar ki haisiyat se kewal itna keh saktaa
hoon ki pitaaji ka jeevan aur sangeet ek hi hai.. is-se jyada main unke
baare me kuchh aur nahin jaan sakaa.. unke anginat
geeton me ye geet prastut hai
Ab ke baras bhej bhaiyya ko babul..
*concludes*