Tu Paas Bhi Ho To Dil Beqarar Apna Hai
- Ahmed Faraz
Tu paas bhi ho to dil beqarar apna hai
Ke hum ko tera nahin intezar apna hai
Mile koi bhi tera zikr chhed dete hain
Ke jaise saara jahaan raazdaar apna hai
Woh door ho to baja tark-e-dosti ka khayaal
Woh saamne ho to kab ikhtiyaar apna hai
Zamaane bhar ke dukhon ko laga liya dil se
Is aasare pe ke ik gham gusaar apna hai
'Faraz' raahat-e-jaan bhi wohi hai kya keeje
Woh jis ke haath se seena figaar apna hai